Հույզերը մշտապես եղել են բանականության, լեզվագիտակցության, կրթական և առօրյա վարքի անբաժանելի մասը։ Հաղորդակցման ժամանակակից միջոցները, հատկապես համացանցը, նպաստում են միջմշակութային հաղորդակցությանը, որն էլ իր հերթին հագեցած է հույզերով։ Հույզերը բազմազան են, ուստի բազմաթիվ են նաև լեզվում գոյություն ունեցող հուզարտահայտչական միավորները, որոնք կիրառվում են հաղորդակցության ընթացքում։

Մենագրության նպատակը հուզարտահայտչական միավորների կիրառման հնարավորությունների և առանձնահատկությունների ուսումնասիրությունն է համացանցային հաղորդակցության ընթացքում։ Մենագրության մեջ իրականացվում է հուզական մտածողության խոսքային և ոչ խոսքային արտահայտչաձևերի համալիր քննություն համացանցային հաղորդակցության մեջ։

Մենագրության մեջ ուսումնասիրված են այնպիսի երևույթներ, որոնց շնորհիվ ձևավորվում է հաղորդակցական ներուժը, այդ թվում՝ հուզականության կարգի դրսևորման առանձնահատկությունների քննությունը համացանցային հաղորդակցության մեջ։

Մենագրությունը նախատեսված է լեզվի և ճանաչողության փոխկապակցվածության, խոսքաստեղծման և խոսքային ներգործման հարցերով հետաքրքրվող մասնագետների լայն շրջանակի համար։ Այն կարող է գործածվել նաև մագիստրոսական ուսուցման կիրառական լեզվաբանության և հոգելեզվաբանության դասընթացներում։