Դոնի Ռոստովի «Նոր Նախիջևան» հայկական համայնքի գործադիր տնօրեն Սերգեյ Սայադովը, երկար տարիներ զբաղվելով 18-19-րդ դարերի պատմության խնդիրների հետազոտմամբ, ռուս պատմաբան Սերգեյ Գլինկայի աշխատանքների ուսումնասիրությամբ, այսօր ներկայացրեց իր նոր մենագրությունը:

«Գրքի հրապարակումը նման է երեխայի ծնունդի, և ես ուզում եմ իմ ուրախությամբ կիսվել ձեզ հետ»,- ասաց հեղինակը:

Ինչպես գրքի շնորհանդեսի բացման խոսքում նշեց ԵՊՀ հայագիտական հետազոտությունների ինստիտուտի փոխտնօրեն Մհեր Հովհաննիսյանը, այս գիրքը նշանակալից է ոչ միայն իր պատմագիտական արժեքով, այլև այն հանգամանքով, որ Ռուսաստանի հայագետների հետ համագործակցության երկարատև դադարից հետո, սա, թերևս, կարևոր քայլ էր այն վերսկսելու համար:

«Մեզ համար կրկնակի ուրախություն է, որովհետև այն հայագիտական կենտրոնը, որը ղեկավարում է պարոն Սայադովը, հիմնադրել է ԵՊՀ-ն Ռոստովի «Նոր Նախիջևան» համայնքի հետ: Այսօր մենք ներկայացնում ենք այդ կենտրոնի առաջին արդյունքները»,- ասաց Մհեր Հովհաննիսյանը:

Սերգեյ Սայադովը նշեց, թե ինչպես է իրեն զարմացրել ամբողջ կյանքում ռուսական պատմությունն ուսումնասիրած պատմաբան Գլինկայի գրած հիանալի պատմությունը հայ ազգի մասին, նաև ներկայացրեց, թե ինչպես է ինքը չորս տարի ուսումնասիրել այդ թեման և արխիվներում փնտրել Գլինկայի ու Լազարյանների կապը:

«У истоков русского арменоведения: историографический обзор» մենագրությունից բացի՝ այսօր ներկայացվեց նաև «Собрание актов, относящихся к обозрению истории армянского народа» գիրքը, որը կազմել է Սերգեյ Սայադովը, իսկ խմբագիրը ԵՊՀ ռեկտոր Արամ Սիմոնյանն է: Սա առաջին հատորն է հայտնի եռահատորյակի, որը Լազարյանների պատվերով պատրաստել էր Գլինկան՝ այն դարձնելով Ռուսաստանի պատմության հայկական բաժնի փաստավավերագրական ամենախոշոր հավաքածուներից մեկը: Փաստաթղթերի հավաքածուն, լույս տեսնելով 1830-ական թվականներին, այլևս չէր հրատարակվել: Առայժմ հրատարակվել է եռահատորյակի միայն առաջին հատորը:

«Այս աշխատությամբ գիտական նոր շրջան է սկսվել ռուսական հայագիտության համար: Մինչ այս այն տարբեր բաժիններով էր ներկայացվում, իսկ սա համընդգրկուն մի աշխատություն է, որում կոնկրետ ներկայացված են նաև աղբյուրները: Երբ գիրքը ներկայացրի Արամ Սիմոնյանին, վերջինս, իմանալով, որ Հայաստանում այս գրքից ոչ մի օրինակ չկա, միանգամից հանձն առավ հրատարակման աշխատանքները»,- ասաց Սերգեյ Սայադովը:

Գրքի շնորհանդեսի ավարտին ներկաներն իրենց շնորհակալությունը հայտնեցին Սերգեյ Սայադովին կատարած հիանալի աշխատանքի համար:

«Իմ մեծ հիացմունքն եմ հայտնում այս շատ արժեքավոր գրքերի լուսընծայման առթիվ: Մեկ անգամ ևս շնորհավորում եմ մեր սիրելի Սայադովին վիթխարի աշխատանքի ու հայագիտության մեջ իր ներդրման համար»,- նշեց ԵՊՀ պատմության ֆակուլտետի դեկան Էդիկ Մինասյանը:

Նշենք, որ գրքերը Հայագիտական հետազոտությունների ինստիտուտի նախաձեռնությամբ հրատարակել է ԵՊՀ հրատարակչությունը: