ԳՐՔԵՐ
ՀԵՂԻՆԱԿՆԵՐ 
ԵՊՀ-ի և «Հետազոտական ռեսուրսների կովկասյան կենտրոն (ՀՌԿԿ)-Հայաստան» հիմնադրամի նախաձեռնությամբ հանրության դատին հանձնվեց անգլերեն լեզվով հրատարակված «Հայերն աշխարհում. միգրացիա և վերազգայնություն» ժողովածուն ու «Միգրացիայի և մարդկային կապիտալի վերարտադրության փոխառնչությունը Հայաստանում» գիրքը:
Միջոցառման մասնակիցներին ողջունեց ԵՊՀ ուսանողների, շրջանավարտների և հասարակայնության հետ կապերի գծով պրոռեկտոր Ռուբեն Մարկոսյանը և նշեց, որ թեման բավականին արդիական է Հայաստանի համար:
«Որպես ակադեմիական հանրություն՝ մեզ համար շատ կարևոր է փորձառու մասնագետների ու երիտասարդների մասնակցությունը նմանաբնույթ միջոցառումներին, օգտակար է նաև թեմատիկ քննարկումների անցկացումը»,- ասաց պրոռեկտորը:
«ՀՌԿԿ-Հայաստան»ի տնօրեն Հեղինե Մանասյանն էլ հավելեց, որ միգրացիան այսօր հասարակության բոլոր շերտերի համար դարձել է ամենաառաջնային խնդիրներից մեկը, որը զարգանալու և ընդլայնվելու միտում ունի:
Այնուհետև ԵՊՀ սոցիոլոգիայի ֆակուլտետի դեկան Արթուր Մկրտիչյանը, ով «Հայերն աշխարհում. միգրացիա և վերազգայնություն» գրքի խմբագիրն է, խոսեց ժողովածուում ներառված աշխատանքների մասին, ներկայացրեց հեղինակներին:
Նշենք, որ գիրքն անդրադառնում է հայերի միգրացիային աշխարհում՝ ներառյալ արտերկրի հայկական համայնքների հետ Հայաստանի համայնքների փոխհարաբերությունները:
Իսկ «Միգրացիայի և մարդկային կապիտալի վերարտադրության փոխառնչությունը Հայաստանում» գիրքը ներկայացրեց ԵՊՀ դասախոս, տնտեսագիտության դոկտոր Հարություն Մարզպանյանը:
Գրքում ներկայացված են մարդկային կապիտալի տեսության քննադատական վերլուծության հիման վրա Հայաստանում միգրացիայի և մարդկային կապիտալի վերարտադրության փոխառնչությունները՝ կարևորելով միգրացիոն ռիսկերը:
Հավելենք, որ Հարություն Մարզպանյանի, պրոռեկտոր Ռուբեն Մարկոսյանի և ԵՊՀ սոցիոլոգիայի ֆակուլտետի դոցենտ Սեդրակ Աստվածատուրովի հեղինակած ու ԵՊՀ հրատարակչության ջանքերով լույս տեսած գրքում տեղ են գտել ոչ միայն դասախոսների, այլև ուսանողների հետազոտությունները:
